What matters more in life? Is it sheer height, or is it depth? Without any exception, every living soul craves for chimeric heights, sacrificing much more that he can ever gain. You might be lucky if you haven't realized this yet, for ignorance of course is bliss. Inspired by Atalji's masterpiece, Oonchai, the following is my take on Gehraai.
Jeevan ke uddeshya mein gehraai hai,
Prakriti ke satya mein gehraai hai,
Brahmaand ka anth hi gehraai hai,
Vidya ki shikhar hi gehraai hai.
Maanavjaati ko aaj chhichlaapan nahin, gehraai chahiye.
Woh gehraai jo jheel sareekhi
aankhon mein ho, maasoomiyat ke roop mein.
Woh gehraai jo kisi ke
rishton mein ho, pavitrata ke roop mein.
Jab bhakti mein ho who gehraai,
to milti hai apporva shanti,
Jab tap mein ho woh gehraai,
to deti hai aparajeya shakti.
Nihit ho jab wo jeevan mein,
to ban jaati hai ek uddeshya.
Nihit ho jab wo baadalon mein,
to ban jaati hai oonchai.
Yahi gehraai shabdon ko,
arthapoorna kar de.
Aur yahi gehraai us arth ko,
goodhta aur satyata se bhar de.
Kaash, yahi gehraai hoti vichaaron mein,
ki hum samajh paate,
kya satya hai,
aur kya drishti ka bhram.
ki hum dekh paate,
manzil ab bhi paas hai,
aur waqt hai mera humdum.
Yahi gehraai hoti kartavyon mein,
ki hum anubhav karte,
ki zindagi ek lakshya hai,
jidhar badh rahe hain hamaare kadam.
Aavashyakta hai humein gehraai ki,
kyonki gehraai hai ek nayaa aayaam,
jiski paridhi mein hai mahaanta aur oonchai.
Aur saagar ki gehraai hi to, motiyon ki khaan hai,
Man hi gehraai hi to, ishwar ka pawan dham hai.
